Sprokietyd

Eendag, lank gelede het Rooikappie
geloop en smul aan ‘n happie
toe ‘n varkie vir haar sê
Wolf het sy huisie in puin gelê.

Hulle begin toe die nuus versprei -
Wolf het die varkie ondergekry.
Eerste vertel hul vir Gouelokkies
wat haarself skrik uit haar sokkies.

Die Drie Beertjies het als gadegeslaan
en wou dadelik weet wat aangaan.
Toe Rooikappie vir hulle vertel
het hulle gehardloop soos die hel.

Toe die Sewe Dwergies daarvan hoor
wou hulle Wolf kaal hande vermoor,
maar Sneeuwitjie het hulle kalmeer
want sy was bang hulle kry seer.

Hansie en Grietjie het vasgesteek
waar hul besig was om brood te breek
en besluit om alles net so te los
en die res te volg deur die bos.

Die heks in die lekkergoedhuisie
was geheel en al nie by haar wysie.
Hulle het haar maar laat staan
en met hul roeping voortgegaan.

Rooikappie se ouma trek van skok
haar onderklere aan bo-oor haar rok.
Die houtkapper het met hulle gestry -
natuurlik omdat hy aan Altzheimers ly.

Ouma het gedog hy trek hulle ‘n streep
en het hom aan sy hare agterna gesleep.
Net toe hulle vir Jan wou sê
Wolf het die varkie se huis in puin gelê

gryp Wolf hom aan sy keel
in ‘n poging om sy byl te steel.
Tot vandag toe weet niemand
hoe het Jan die wolf se hand

om sy keel losgekry,
maar almal was baie bly
toe Jan pure man omdraai
en skree: “Wolf - sê koebaai!”

Een swaai van die byl
was genoeg om Wolf op te keil.
Daardie aand het hulle fees gevier,
want Jan het Wolf na sy graf gestuur.

Aandgesprek met God

In stille gebed vanaand
het ek jou opgedra
aan my Pappa God
en vir Hom gevra
om jou retoerkaartjie
na droomland te borg
vir wondersoete rus.
Hy’t gesê Hy sal sorg
dat jy môre oggend
oudergewoonte terugkeer
vanuit droomland en my
herinner Hy is in beheer
van die betrokke vlug.
Hy’t gesê Hy ken jou
en vir my vertel dat Sy
engele oor jou sal waghou.

Harlekyn van my hart

Vandat ek jou ontmoet
het het jy jouself al hoe
stewiger vasgeheg aan
my hart se binnekamers
soos in so dat dit nou
prentjiemooi vertoon
oor die kleur wat jou
teenwoordigheid afgee.
My wens is dat ons in
simbiose sal saamleef
en die kleur immergroen
sal vertoon vir ewig,
want jy bring ongekende
vreugde in my lewe as
jy met jou verfkwas ‘n
glimlag op my gesig verf.

Vriendelike vyandskap

Moenie mense

situasies toebid

waarin jy self

nie sal wil sit

want as die

wiel draai

dan is jy

in jou

maai

Die digter se lot

Die woorde waarmee jy

roem verwerf gaan

maak dat jy

stadig sterf

aan lesers

se lippe

Op jou verjaarsdag

Opgedra aan Dr. Suzanne Bester

Jy
wat vandag jou verjaarsdag herdenk
is vir baie die grootste geskenk.

Jy wat aan ander jou liefde uitstraal –
mag Hy Sy liefde aan jou openbaar
elke dag van die nuwe lewensjaar.

Jy wat weer betekenis aan lewens gee –
mag Hy jou in jou werke seën
en nog lank vir vriende en familie leen.

Jy wat troos aan ander bied –
mag Sy beskermengele saamtrek in ‘n laer
om jou teen die lewe se seerkry te bewaar.

Jy wat vrede bring in ander se gemoed –
mag Sy vredesduif op jou neerdaal
en onstuimigheid uit jou hart haal.

Jy wie ander met hul probleme opsaal –
mag Sy lig in jou lewe so helder skyn
dat jou eie sommer in die niet verdwyn.

Jy wat Suzanne is –
ek hoop jy geniet jou verjaarsdag
waarvoor jy 365 dae lank moes wag.

Moeilik was nog nooit maklik nie

As alles so eenvoudig was
soos ander dit wil voorstel
sou niks nooit ‘n uitdaging
gewees het vir die mens nie
en sou ons als in die lewe as
vanselfsprekend ervaar het.
‘n Sukkelbestaan se waarde
lê daarin opgesluit dat jy tot
diepere insigte kom sodra
alles in plek begin val en dat
jy toenemend bewus word
van ander moontlike opsies.

Goeie oes

My pappa se saad is
van ‘n goeie gehalte,
my mamma baar nie
slegte verloorders nie,
maar slegs aanhouers
wat wen op die einde.

Sonja

Opgedra aan Sonja Coetzee

Sonnige geaardheid
Omgeemens
Nooit onredelik
Jonk van gees
Altyd daar vir almal

God se belofte

Ons word nie gebore
met plakkers wat sê:
“Hanteer versigtig
as jy hom/haar oplig!”

Daar is darem Sy
belofte wat sê:
“Ek sal by jou wees;
jy hoef niks te vrees!”

-Jesaja 41:10 aangepas-

Spectacle

How they reached the top,

that I can’t tell you,

all that I can see

is heroes of

the past

falling

down

Skouspel

Hoe hulle bo uitgekom het

kan ek nie sê nie, maar

ek sit en toekyk

hoe my helde

van vroeër

almal

val

God’s Promise

We haven't been born
with stickers indicating:
“Handle with care –
this specie is rare!”

But there is His
promise saying:
“No need to fear
when I am near!”

-Isaiah 41:10 adapted-

Verlore siel

Tussen die klere in my kas;
op my knieë op die vloer;
op elke moontlike plekkie
waar ek kosbaarhede sou
versteek in die verlede
tas ek soekend rond
met die hoop dat ek my gees
sal kry wat snags by my spook.

Joernaalartikel

Reeds in die Inleiding
maak ek melding van Hom
wat my as mede-outeur help skryf
aan die verhaal van my aardse verblyf.

Die inhoud bevat
nes dit maar met enige mens gaan
HOOGTEPUNTE
&
laagtepunte
van my aardse bestaan.

Ten slotte –
Sy genade alleen sal bepaal
hoeveel bladsye ons sal skryf
voor Hy my kom haal.

Die bibliografie
sal slegs een verwysing bevat
Sy Woord
waarvolgens ek my lewe rig en lei.

My mede-outeur, Jesus, sal oplaas
in die Joernaal van die Lewe
ons twee se skryfstuk plaas.

God se boom

Maak my soos die boom in
Psalm 1
wat sy wortels in U anker –
die Ewige Lewe –
sodat ek kan vrugte dra
vir mense
en hulle U al hoe meer sien in
my

Drafstappie deur studentwees (Deel 3)

Onthou jy
die pret om ander wakker te klop
en ‘n entjie weg te staan
wanneer die deur oopgaan
sodat jy hul gesigte kan sien;
die moeilikheid oor die vissmeer
op Alicia se kamerdeur;
die tandepasta aan die deurhandvatsels;
kleefband aan die onderkant voor die deur;
die frustrasie om op elke vloer te stop;
die dae as die hysbakke gebreek was;
by wie het jy gebedel vir ‘n las
vir sigarette by Desmondi-Kafeteria;
die angs wat op jou toesak
die dag as die hysbak
‘n paar vloere ver val
en ons moet wag vir die operateur;
die dae van saamrygeleenthede vra
as jy dit nie kon weerstaan
om saam jou pelle uit te gaan
en sosiaal te verkeer die betrokke aand;
die heimweë wat Sally Williams Nougat bring;
hoe het ons die Huislied uit volle bors gesing;
hoe het ons deurnag wakker gebly
vir eksamens, take, toetse en portfolios;
die tipiese DVD en pannekoek dae -
ons het nie oudergewoonte vroeg opgestaan
om na lesings in die L-lokale te gaan,
maar sulke dae in ons kamers deurgebring;
die kere van huis toe bel
om vir ons ouers te vertel
ons het geld nodig om
handboeke te kan koop
net sodat ons op ons manier
geld kon kry om te spaar
vir die kuiers wie weet waar
op planeet Aarde;
jou mentor dosent se eerste krit
en hoe hard het jy voor die tyd gebid;
die legendariese Pynappel voor die Bib;
die vrees vir Tannie Kas;
Kampusdokter wat nie sieknotas gee
wanneer jy jouself wysmaak
jy’s besig om siek te raak
voor jy moes gaan toets skryf;
hoe het jy dan jou lot gaan bekla
en vir ‘n sieknota gaan vra
by Little Company of Mary;
Mareli se menigte migraines;
die koue storte as die warm water op was;
ons het ons skottelgoed in die badkamer afgespoel
al was die waskamer eintlik daarvoor bedoel;
die gewag as jy die wasmasjien wou gebruik;
hoe jy metgeselle moes kry
om jou na die Huisdinees te karwei;
Oktober se eksamen ete in die eetsaal
voor jy soos ‘n skaap ter slagting gelei word
na die alombekende Gimsaal
om eksamens af te lê in jou modules;
die hartseer wanneer jy jou 50-tal mis
en die blydskap as jy wel deur is;
die eksamenregisterstrokie se kenmerkende kleur;
eksamen toesighouers wat jou inwag by die deur;
mense se vraende blik as jy sê jy swot
Sosiopedagogiese Ingenieurswese;
die vreugde om na vier jaar...selfs vyf
na die Aula te kan gaan,
langs die Dekaan te staan
en jou naam te hoor eggo;
die fotograaf Gordon Harris
wat sinoniem met Tukkies is
het die trots van daardie oomblik
vir ewig vasgevang op ‘n foto?

Nuwejaarswense

Terwyl die son sy vere regskud
om sy verskyning te maak
en jou met sy strale aan te raak -
wil ek hom voorspring vandag

deur die eerste een te wees
om vir jou te kan sê -
mag jy ‘n goeie oesjaar hê
deurdat jou drome wortelskiet.

Voor die voëls se oggendlied
wil ek Hom eers vra
om jou in Sy handpalm te dra
deur die loop van die jaar.

Voor mense van voor af begin
om planeet Aarde te besoedel –
mag Hy jou hart opnuut vul
met geloof, hoop en liefde.

Voor duisende der duisende
toeriste die Afrika vlaktes vertrap –
mag Hy jou beskerm teen Jan Rap
en sy maat wat moor van dag een af.

Voordat jy vir die eerste keer
vanjaar van die maan bewus raak
as hy sy verskyning maak -
mag Hy Sy seën op jou uitstort.