Definisie van geduld

Geduld is ‘n ma se

Gawe om
Elke keer as sy
De donner in is
Uiters vriendelik te
Lyk sonder
Dat ander onraad vermoed

Ma s’n vir altyd en ewig

Jy was die rede

vir die vonkel

in my oog

na my besoek

aan die

ginekoloog.

9 maande later

laat breek

jy my water.

Jou eerste babagil

het my met

dankbaarheid gevul.

Daar was jou eerste

glimlag,

tand,

treë,

woord,

skooldag,

die matriekafskeid,

jou gradeplegtigheid,

verlowing,

troue

en vandag se vreugde

oor daardie bondeltjie

wat jy jou eie kan noem.

Lank reeds nadat jy

jou eie het wie jy

saans in die bed sit

en vir wie jy konstant

op jou knieë bly

om voor te bid...

ja, lank reeds

na dit alles

bly jy steeds

Ma se kind.

Definisie van ‘n Ouma

Oulike tannie wat

Uit haar pad uit gaan om ander

Mammas se kinders met

Allerhande lekkernye te bederf

Die Slag van Bloedrivier

Soos soldaatjies

marsjeer hulle

die lokaal

binne in gelid

en gaan sit.

Op bevel van

die Samajoor lê

hulle aan sodra

die laaste soldaatjie

in besit is van

‘n antwoordblaadjie.

Na 2 ure en 55 minute

word hulle aangeraai

om terug te val,

want die tyd loop uit.

Na 3 ure staan hulle

soos een man

op met die wete:

Dié wat nie 50 haal nie

sal UP weer

aanstaande jaar

opkommandeer...

Gelukkige Moedersdag Merkwaardige Vrou!

As jy
praat
spreek jy
waarheid
en jou
kyk
dui op
begrip.

As jy
luister
is dit met
geduld
en as jy
koester
is dit met
sagtheid.

As jy
vergewe
is dit sonder
verwyt
en as jy
liefhet
is dit
onvoorwaardelik.

As jy
oordeel
is dit met
regverdigheid
en as jy
dien
is dit met
oorgawe.

As jy
help
is dit omdat jy
omgee
en as jy
doen
is dit met
deeglikheid.

Oulik verby

Spesiaal geskryf vir Prof. Ferreira 

Inteendeel...

Wat jy vir

Ander beteken

As persoon kan nie eers die

Rand

Dollar-prys vertoon nie, so

Ek wil net sê:  Jy’s

Veel meer werd as wat jy

Ooit in jou

Lewe sal besef

Ek is van nature na Sy beeld geskape

Mag my
liefde
fel op jou
neerbrand

en jy my
ondeundheid
onthou op
die dae wat
Jakkals trou
met Wolf se vrou.

Mag jy my
omgee
vereenselwig
met die
sterre
se lig

en my
skaterlag
vergestalting kry
in die rammel
van die wolke
tydens ‘n reënbui.

Mag die wind
se nadraai my
alomteenwoordigheid
na jou toe aanwaai

en die reënboog
jou altyd herinner
aan my opregtheid.