Vul my, Here

Geskryf na aanleiding van Duitsland se sege van 4-1 teenoor Engeland en die preek op die 27ste Junie 2010 by die Nederduitse Gereformeerde Kerk Unitaspark

Vul my vanaand met
U Heilige Gees
in die mate waarin Duitsland
deelneem aan die sokkerfees.

Vier seisoene verder

Vroeg vanoggend het
ek aan jou deur geklop,
maar met die winterslaap
staan jy soggens laat op.

Ek het toe maar my
oë opgeslaan na Hom
en gevra dat Hy jou
hart sal laat blom.

Ook het ek Hom gevra
om jou te seën -
dat emmers vol van
liefde op jou sal neerreën.

Hy het my belowe dat
Sy lig in jou lewe sal skyn,
selfs al verloor blare hul kleur
en begin die somerson te kwyn.

My superhero pappa

By my pappa geniet ek
Batman
se beskerming
as sy hande my soos
Spiderman
se web omring

'n Vrou se tuingereedskap

Vriendinne is nes

tuingereedskap.

Hulle hark jou

versplinterde drome

bymekaar, gooi dit in

die asblik

en spit die seer

weg deur daaroor te grap.

So sorg hulle nes grafies dat

jy weer op gelyke voet met hulle is.

Met trane van blydskap lei hulle

jou nat as jy 'n nuwe mens daar

uitsien danksy hul drukkies

kunsmisliefde wat maak dat jy floreer.

Tuingereedskap.  2001.  Beskikbaar te:  http://www.kiwiboer.virafrikaans.com/images/tuingereedskap2.jpg.  Datum geraadpleeg:  24 Julie 2010.

Wense vir ‘n waterwyser

Spesiaal geskryf vir Oom Johan

Mag jy nie jou geld

in die water gooi;

met spyt dink aan die

boorkontrakteur se fooi.

Mag die volgende gat

wat jy beplan om te sink

galonne water spuit wat

‘n mens sal kan drink.

Water drill.  2010.  Available at:  http://product-image.tradeindia.com/00171755/b/0/Water-Well-Drilling-Rig-PRD-Max-Drill-2000-.jpg.  Accessed:  24 July 2010.

Maak my gee 'n neem, Here

Gee dat ek nie
langer in gebed
sal vra: "Here, gee
my wat ek nodig het!"

Gee dat ek eerder
in die vervolg sal sê:
"Neem my en maak
my soos U wil hê!"

Voorskriftelike bepalings

Jy mag my
vashou,
maar
moenie my
versmoor
nie

Jy mag my
soen,
maar
moenie met
my liggaam
mors
nie

Jy mag my
hartsnare
roer,
maar
moenie dit
breek
nie

Jy mag my
joune
noem net
as jy nie
die reëls
verontagsaam
nie