Dankie Pappa

Dat jy nooit daarvoor moeg raak
om stukkende speelgoed reg te maak.
Dat jy vir ons geld skool toe gee;
nooit vir ‘n spelery sê nee.

Dat jy my op jou nek ronddra
as ek oor dorings op die grasperk kla.
Dat jy ons van kleintyd af leer:
“Mislukkings sê jy moet harder probeer!”

Dat jy saans die hekke en deure sluit;
moordenaars sal sukkel om ons lewens te buit.
Dat jy in die aande vir ons almal bid;
agter ons aanloop en die ligte afsit.

Dat jy nooit jou kinders verwens -
jy wat weet foute maak is sinoniem met mens.
Dat ek my nie oor my opvoeding hoef te skaam
as my maatjies se ouers sê: “Kom saam!”