My sondaarstryd

Ek wil hê die hemel
moet my woonplek wees,
maar maak nie aldag tyd
om my Bybel te lees.

Ek probeer hard om
volgens U Wet te handel,
maar geniet dit ook om op
die breë weg te wandel.

Ek het hoeveel keer
vir U om vergifnis gevra
en myself dae later
net soos voorheen gedra.

Vanaand wil ek in stille
gebed by U kom pleit –
help my vir die soveelste
maal met my sondaarstryd.

Ek wil na U toe terugdraai
voordat dit te laat is
en voortaan die afdraaie
van verderf totaal en al mis.

Gee dat ek genoeg
innerlike krag sal hê
om in die toekoms
vir sonde nee te kan sê.

57 herfsjare

Here, party families se vaders

word vroeg reeds van hulle

af weggeneem in die lewe.

Terselfdertyd is daar kinders

wat nie eers weet wie

hul aardse vaders is nie.

Dit het my laat besef hoe

gelukkig ons is om nog

ons pa by ons te kan hê.

Vandag wil ons vir U sê

DANKIE

vir die sewe en vyftig herfsjare

wat Pappa met sy grys hare

deel van ons lewens kon wees.

Bevordering

Geluk
met jou
aanstelling!

Ek hoop jy
vind gou jou
voete

met al die
werksaamhede
en goete

en dat dit
geluk
sal bring.

Moeilike mens

Voorheen het ek
nie regtig geweet
wie of wat presies
jy nou eintlik heet
nie, maar nou’t ek jou
mikroskopies ontleed
en pak ek jou nie meer
sonder handskoene beet.

Vlieg in jou @!#*

Ek het jou op
‘n troontjie
geplaas,
maar jy’t
afgebliksem
die dag toe
jou woorde
my soos ‘n
bliksemstraal
getref het.
As jy kyk
sal jy sien
die plek
in my hart
waar jou
woorde
my getref
het vertoon
spierwit,
want ek
voel fokkol
vir mense
wat my
integriteit in
twyfel trek.

Gebed van die vroue van Afrika

Ons vergader tesaam -
vroue van oraloor –
om vandag U naam
in gebed aan te roep.

Sal U soos ‘n held
van ouds ons en
ons kinders beskerm
teen wêreldse geweld?

Skenk ons krag
vir die rolle wat ons
vervul elke dag
van ons bestaan –
van waar ons vir
kinders moet ma speel
tot waar ons ons
liefde met mans deel.

U ken elke enkelma
by haar naam en
daarom wil ons vra –
seën hulle finansieel.

Gee dat ons U liefde
eerstehands ervaar
as mans egskeidings
teen ons verklaar.

Help ons baklei
teen Satan sodat hy
nie die oorhand kry
in ons lewens nie
en gee dat verlore
vrouesiele sal wis
dat hulle sonder U
absoluut niks is.

Maak die van ons
wat onsself afsloof,
maar steeds arm bly,
asseblief ryk in geloof.

Parmantigheid op hoë note

Jy weet jy's
arrogant
as jou
spieëlbeeld
met jou
terugpraat